भारत की संस्कृति के लिए... भाषा की उन्नति के लिए... साहित्य के प्रसार के लिए
लोक संगीत
कविता कोश विशेष क्यों है?
कविता कोश परिवार

अङ्गुरका पातहरू / नोरेम

Kavita Kosh से
यहाँ जाएँ: भ्रमण, खोज

पोहोर साल पनि
यसरी नै पलाएका थिए पातहरू
यी अङ्गुरका बोटहरूमा
 
गर्मीको पट्यारलाग्दो
सन्नाटामा
लहलहाउँदा पातहरू
सुनसान थिए
चुपचाप थिए
अलिकति हावा
अलिकति शीतलताको खोजीमा
त्यहाँ तिमी थियौ
त्यहाँ म थिएँ

“प्रकृतिको भाषा थाहा छ ?”
तिमीले सोध्यौ
“तिमीलाई थाहा भए
पातहरूको
यो मौनता भङ्ग गर न त”
मैले भनेँ

तिमीले अनायास
अनौठो पाराले सुसेल्न थाल्यौ
म त छक्क परेँ
अङ्गुरका पातहरू अचानक
हावामा लहराउन थाले
 
खुसी र आश्चर्यले
मैले तिमीलाई
निक्कैबेर हेरिरहेँ
टोलाउदै हेरिरहेँ
 
यो सालको
चर्को गर्मीमा
यी अङ्गुरका झ्याङ्हरू मुनि
अमूर्त सम्झनाको कोलाजमा
यतिबेला
म एक्लै छु
 
अचम्म !
पोहोर सालको
तिम्रै सुसेली
अनायास सुसेल्दा
यी चुपचाप पातहरू
फेरि त्यसरी नै लहराए
फेरि त्यसरी नै सल्बलाए
 
शरीरमा आएको
यो अनौठो कम्पन
यो मीठो शीतलता
के तिमी नै होइनौ ?