भारत की संस्कृति के लिए... भाषा की उन्नति के लिए... साहित्य के प्रसार के लिए
लोक संगीत
कविता कोश विशेष क्यों है?
कविता कोश परिवार

अब्बो ले सुपवा बोलेला / जयशंकर प्रसाद द्विवेदी

Kavita Kosh से
यहाँ जाएँ: भ्रमण, खोज

ताल तलहटी, गाँव क रहटी
कब फूटल किस्मत खोलेला
अब्बो ले सुपवा बोलेला।

दिन में खैनी साँझ क हुक्का
भोरे आइल साह क रुक्का
खेती में जब भयल ना कुछहु
अन्दाता फुक्के का फुक्का
बिगरल माथा डोलेला। अब्बो ले सुपवा बोलेला।

बाढ़ में बहल गाँव पर गाँव
पहरी पर बनल मोरा ठांव
मदत लीहने शहरी बाबू
अब कइसे पड़ी मोर पाँव
फ़ांस में, मुड़ी तोलेला। अब्बो ले सुपवा बोलेला।

नन्हकी आपन भइल सेयान
कब ले राखब ओकर धेयान
धावत धूपत घीसल पनही
बेटहा के बा ढेर पयान
आस क थुन्ही डोलेला। अब्बो ले सुपवा बोलेला।

बंसखट भइल दुआरे सपना
बइठे वाला के बा अपना
नेह छोह के किस्मत फूटल
लेहल देहल भइल कलपना
मन, गगरी विष घोलेला। अब्बो ले सुपवा बोलेला।

हम त बानी लइकी के बाप
सोचते छाती लोटत सांप
कइसे लागी हाँथे हरदी
सोचते बेरी गइली काँप
बेटवा माई तोलेला। अब्बो ले सुपवा बोलेला।