भारत की संस्कृति के लिए... भाषा की उन्नति के लिए... साहित्य के प्रसार के लिए
लोक संगीत
कविता कोश विशेष क्यों है?
कविता कोश परिवार

पहराको साँघुरो बाटोमा / मनु मन्जिल

Kavita Kosh से
यहाँ जाएँ: भ्रमण, खोज

पहराको साँघुरो बाटोमा
हजुरसित भेट भएथ्यो …. !
सोचेको थें– हाम्रो भेट
कुनै सहरतिर हुन्छ होला
सोचेको थें– हाम्रो भेट
गाउँतिर हुन्छ होला !

मैले त चौतारो सोचेको थें
कुनै देउराली सोचेको थें
नभए सपनामा भेटूँला
नभए सम्झनामा भेटूँला ….. !
तर, कहिल्यै नसोचेको
पहराको साँघुरो बाटोमा
हजुरसित भेट भएथ्यो !

बाटो साँघुरो भएरै
हजुरलाई छुन पाइयो
यस्सो पन्छिएर …. हजुरको यात्रालाई
बाटो दिन पाइयो !
बाटो साँघुरो भएरै हजुरसँग एक क्षण
सँगै उभिन पाइयो
हजुरलाई भेट्ने कत्रो रहर मेरो
पूरा गर्न पाइयो ।

जीवनमा चौडा सडक नै
जम्मै यात्रा होइन
जीवनमा खुला मैदान मात्रै
खुसीको परिभाषा होइन !
जस्तो कि पहराको साँघुरो बाटोमा
हजुरसित भेट भएथ्यो ……
अनेक फराक संसारमा जो
कहिल्यै सम्भव भएन !