भारत की संस्कृति के लिए... भाषा की उन्नति के लिए... साहित्य के प्रसार के लिए
लोक संगीत
कविता कोश विशेष क्यों है?
कविता कोश परिवार

कमली दमिनी / शकुन्तला जोशी

Kavita Kosh से
Sirjanbindu (चर्चा | योगदान) द्वारा परिवर्तित 16:41, 30 जुलाई 2018 का अवतरण ('{{KKGlobal}} {{KKRachna |रचनाकार=शकुन्तला जोशी |अनुवादक= |संग्रह= }} {...' के साथ नया पृष्ठ बनाया)

(अंतर) ← पुराना अवतरण | वर्तमान अवतरण (अंतर) | नया अवतरण → (अंतर)
यहाँ जाएँ: भ्रमण, खोज


ऊ बेला पहाडमा
बाऊको पयरकलको मुनिबाट
सुटुक्क चोरेर ल्याएकेा
झिल्के कपडाका टालाटुलीमा
खुब राम्रो बेहुली सिंगारेर
‘बेहुली’ खेल्थ्यौं
कमली दमिनी र म

कहिले बेहुली सानी भएकोमा रिसाउँथी ऊ
कहिले बेहुला पुड्को ल्याएकेा ठुस्किन्थें म
ढुंगा र माटाको भतेर चलाउँदै
पातीका फुर्काले जन्ति पर्सदै
रत्यौली र संगिनी नाच्थ्यौं
श्लोक र दोहोरी गाउँथ्यौं
डोली र नौमती बाजामा अन्माउँदै बेहुली
घरी रुन्थ्यौं घरी हाँस्थ्यौ
न दुःख न पिडा न शोक न सन्ताप
बस् ! बेहुली खेल्थ्यौं
र धुलैधुलो भएको बुट्टे जामाको खल्तीमा
लुकाएर टालाटुलीको बेहुली
साँझ घर फर्कन्थ्यौं

एक बिहान
हाम्रो गोजीको पुतलीभन्दा राम्री सिंगारिएकी
कमली डोली चढेर रुँदै-रुँदै
मलाई छोडेर टाढा कतै गई
म धेरै दिनसम्म गोजीमा उसले सिंगारेका
‘बेहुली’ बोकेर डिलमाथि पर्खिरहें
तर आइन
मसँग फेरि ‘बेहुली’ खेल्न कहिल्यै फर्केर आइन-
मेरी सहेली कमली दमिनी ।।